18/11/1986 - 15/2/2013

Menna <3

كل ده علشان يا قلبي تنسى واحدة

قرار

شيء محزن وصادم أما ان ناس يفرقوا معاك جدا وبتتصرف من ناحيتك ان مفيش أي حدود وحواجز بينكم ويعرفوا عنك اللي تعرفوا عن نفسك  بعد كده تكتشف انهم مش بيعتبروك كده و ان في حواجز كتير بينكم و انك مجرد صديق مقرب مش اكتر.

مش هدبدب في الارض واقول لازم اقطع علاقتي بالاشخاص دول بس عشان الصدمة دي متتكررش تاني هقرب كل واحد مني على قد ما بيقربني منه و ده هيوفر مجهود كبير للأطراف كلها.

وبعد تفكير قررت اني مش هعمل أي مجهود إضافي اشرح وجهة نظري أو أوضح موقفي لحد عشان يفضل شايفني حد كويس أو ميبقاش مضايق مني، محروق اي حد انا هو انا حلو وحش قافش كئيب خرا على دماغي انا كده، اللي عايز يقبلني كده على عيني و راسي اللي مش عايز ميضيعش وقت ومجهود على نفسه وعليا.

مش فرض عليهم ومش فرض عليك..

ما بين فبراير و يوليو

وحشتني

أكيد انت  في مكان أحسن من اللي انا فيه بس انت وحشتني أوي كل حاجة مبقاش ليها طعم من غيرك حتى لمت العيلة في اول فطار في رمضان بقى فطار بطعم العذاب والوجع مش فرحة و دفا زي ما زمان.

من سنة  كنت بتصحيني من النوم وممشيتش إلا لما اتأكد اني صحيت وهفطر معاكم، كنت أعظم حاجة وهتفضل أعظم حاجة في الدنيا ربنا يجمعني بيك قريب على خير

ربنا يرحمك ويغفر لك و يجعل مسواك الجنة

رائحة الدم

 بالأمس كان ينتابني شعور بالسعادة يعادل فرحة ليلة العيد كان يشاركني هذا الإحساس الكثير ممن أعرفهم وممن لا أعرفهم الجميع اتفق على رأي واحد هو أن النصر بات حليفنا غداً لأسباب نعتبرها منطقية وهي أننا لا نريد شيئاً لأنفسنا إنما نريد الخير لبلادنا عن طريق استعادة ثورتنا من يد من سطى عليها و فضل أن يديرها بمعزل عن الجميع ما عدا أهله وعشيرته وبغى علينا و أراق دماء العديد من خيرة شباب هذه البلد و ألقى بالآخرين في غياهب السجون  أما الفريق الآخر يزعمون أنهم ينصرون الإسلام وهذا أبعد ما يكون عن الحقيقة و كذب هذا الإدعاء معروف للقاصي والداني هذا بالإضافة أن الأزمات في الآونة الأخيرة حشدت جموع الشعب ضد مغتصبي السلطة فلم نعد اليوم القلة المندسة كما يلقوبنا دوماً فاليوم يقف خلفنا الشعب بجميع طوائفه و لن تستطيع أي قوات امن أو مليشيات مسلحة أن تقف أمام طوفان الشعب.

صبيحة هذا اليوم يسيطر عليّ الرعب والخوف لا من معركة التحرير التي سنخوضها بعد اقل من ساعتين من الآن ولكن عندما بدأت افكر في الطريق الذي سنسلكه حتى نصل لغايتنا ونسقط النظام، الطريق لم يكن ابداً مفروشاً بالورد ولكن هذه المرة هي اكثرهم ضبابية و شراسة فاليوم هي معركة البقاء وكل طرف سيكون واضعاً نصب عينيه إبادة الطرف الآخر فالجموع التي تحتشد لإسقاط النظام لن تقف مكتوفة الأيدي أمام استخدام مليشيات السلطة للرصاص والخرطوش وسيكون الرد بالمثل إن لم يكن أعنف، خلال تلك الحرب الدائرة  ستخلف وراءها قتلى من الطرفين سيعتبرون قتلاهم شهداء الإسلام وكأن معركتنا مع الاسلام وليست مع سلطة جائرة وأما شهداءنا فهم شهداء الثورة والحق و رفع الظلم عن الشعب ولكن في الطرفين سيكون هناك أطفال تيتم و نساءاً تترمل و أمهات تفقد أبنائها وأصدقاء يبكون الدماء لفراق أحبتهم.

لم ولن أخاف من معركة الحق ولكن كل ما يوجعني عندما أتصور أنه من الوارد جداً ان يكون احد شهداء اليوم أخي أو  احد الأصدقاء أو احد رفاق الثورة فلم أعد قادراً على تحمل أن يفرق الموت بيني وبين احد منهم و أن يحوله إلى ذكرى وصورة معلقة على الحائط يعلوها شريطٌ اسود في ركنها العلوي، لا ألقي بالاً لفكرة أن أكون احد هؤلاء الشهداء فهذا شرف عظيم اعرف جيداً بأنني أقل قدراً من أن أناله.

اعرف جيداً انني لن استطيع منع احدهم من النزول ليرفع الظلم عن شعبه ولكني قدر المستطاع سأحاول أن أكون بجواركم ادفع عنكم الاذى ونتشارك المصير. أتمنى أن أراكم عائدين سالمين منتصرين سواء كنت بصحبتكم أو اتباعكم من السماء "رفعت الأقلام و جفت الصحف" .

أزمة ثقة

كل يوم بيعدي المسافات بتبعد و تقاطع الدوائر بيقل ومع كل موقف مباشر أو غير مباشر الغمامة بتتشال و بقيم الموضوع و اكتشف قد ايه كنت ظالم نفسي بوضعية زي دي.

بس مش دي الخسارة الوحيدة، الخسارة الأكبر في الصحاب اللي بيخذلوني بسببها و بينوبهم من البعد جانب و ده وصلني اني احس انه مبقاش ينفع يبقى ليا اسرار مع حد منهم، مش عارف الإحساس ده هل هو شفقة عليهم أنهم يعرفوا حاجة ويبقوا مضغوطين بين انهم يصونوا سر صاحبهم ولا يوضحوا الصورة لصاحبتهم، ولا هي أصلا عدم ثقة أنهم يقدروا يفصلوا ويعملوا ده.

وحدي لكن ونسان و ماشي كده :)

المفاجآت غير السعيدة

لسه بيتملكني احساس الضيق والغضب كل ما حاجة تفكرني بقيت بتعامل طبيعي بس الأثر النفسي السيء بيتجدد، مكنتش كده بس علمتوني سواد القلب علمتوني لما اغلط متسامحوش و لو سامحتوا مبتفتوش فرصة الا وتفكروني مستنيين مني ابقى زي ما أنا؟

.كان عندي يقين انها مش اخر مرة عشان كده كان غضبي كبير و ان كان الناس شايفاه مش مبرر بس دايما رد فعل بيكون على قد الفعل.

تخيلت ان تكرار الموقف مش هيأثر فيا لكن للأسف لسه بضايق صحيح  شوية اقل بس الزعل لسه موجود وكلها حاجات في النية متقدرش تثبتها بس الشواهد باينة وبتقول كل حاجة.

مفيش قدامي غير اني اتعود على كده و اتخلص من الحساسية الزيادة أو اقفل الباب ده خالص الباب اللي يجيلك منه الريح سده و استريح.

 المحزن في الموضوع اني عشان اتعود على كده ناس كتير هيبقى ملهاش طعم في حياتي بس اتفقنا اني ابقى اناني و أفكر في نفسي شويتين زيادة عشان ابقى كويس

معروفة

ليه ممكن تفشخ نفسك تفكير في انك تنقي الكلام و الأسلوب اللي ميزعلش اللي قدامك منك ويخليه يفهمك غلط ما دام في حكم مسبق عليك  مش هيتغير لما ممكن تتصرف من غير حسابات واللي عايز يفهم حاجة هو حر و مش مطلوب منك تبرر وتفسر.

اعتراف

عشان ارجع كويس ومبقاش حمل على اللي حواليا لازم اعترف لنفسي اعتراف ومهربش من المواجهه حتى لو هيحصلي انتكاسة بس أكيد بعد وقت هبقى كويس، أبوك مات ومش هيرجع تاني.